فرشي بي ين اينسان حاقلاريني قوروماق اوچون کامپانييا

 

شنبه  ۱۶ خرداد ۱٣٨٨ -  ۶ ژوئن ۲۰۰۹   

 

بی ام ت، اينسان حاقلاري اوزره عالي کوميسسارليق، ژئنوره  

لوطفا بو ايلتيشمه ني اؤز- خوشونا توتوقلولار اوزره چاليشان قروپا چاتديرين، هابئله آشاغيداکي قروپلارا دا دخلي وار:

 

· قاضيلرين و وکيللرين باغيمسيزليغي اوزره اؤزل راپورتر

 

· بيان و فيکير سربستليگي نين ايره ليلگيشي و قورونماسي اوزره اؤزل راپورتر

 

· چاغداش ايرقچيليک، ايرقي آيري - سئچکيليک و ياد ائليلره قارشي قاتلاشمازليق اوزره اؤزل راپورتر

 

· ميللي آزليقلار اوزره موستقيل موتخصيص

 

 اوزو ديکه بي، خانيم هارريسون، آمنئستي اينتئرناشنال، لوندون

 

  هابئله  اينسان حاقلاريني گؤزتن و اينسان حاقلارينا قوللوقچو  

 

سايين جنابلار

 

ايلتيشمه 1: فرشي بي ين اينسان حاقلاريني قوروماق اوچون کامپانييا

 

جناب علیرضا فرشي ديزج يئکانين اينسان حاقلاريني قوروماق اوچون ايلتيشمه 1- ي حوضورلارينيزا سونوروق کي، او گونئي آذربايجانين مدني فعاليدير و بو آندا ايران يئتکيليلري طرفيندن 22 ماي 2009- دان بري سربستليکدن يوخسون ائديلميش. او اونيوئرسيتئت معليميدير و بيلگي و تئخنولوگيا اوزره اوزماندير. او تبريزده ترتيب اولونموش بير يوروشده آنا ديلي اوغروندا کامپانييا آپاراندا توتوقلانميشدير و بو اولايين دئتايلاري جدول 1- ده تقديم اولونموشدور.

 

تاکيد ائتمک ايسته ييريک کي، بو ايلتيشمه نين ترتيبينده بيز فرشي بي ين عاييله سي ايله علاقه قورماميشيق. بو مسئوليتي بيز اؤز بوينوموزا آلماق ايله اونون بوينوندان مسئوليتي گؤتورمک ايسته ييريک.

 

علیرضا بي فرشي نين ياخالانماسي ايله باغلي 03.06.2009 تاريخينده 516/2009 ساييلي ايلتيشمه 4- ده حوضورلاريزا بيلگي وئرميشديک. بو حاقدا علاوه معلوماتلاري آشاغيدا قئيد ائتمگي ضروري گؤروروک.

 

بيلديگينيز کيمي گونئي آذربايجاندا 22 ماي 2006- جي ايلده کي ديرچه ليشدن سونرا، هر ايل او گونون خاطيره سي ياد ائديلير و گنجلر تظاهوراتلاردا ايشتيراک ائدير. او ديرچه ليشين سببي، ايران دؤولت قزئتي نين آذربايجانليلاري آلچالتيجي کاريکاتورو ايله بيرگه ميللي حاقلارين طلبي اولموشدور. بو ايل دؤنومو ايرانين کئچميش پرئزيدئنت خاتمي نين آذربايجانليلارا قارشي چيرکين سؤزلري نين ويدئوسونون ياييلماسيدا علاوه اولموشدو.

 

بو ايل، بو ايکي حاديثه ايله باغلي اولاجاق گئنيش تظاهوراتي کؤلگه ده بوراخماق اوچون حاکيمييت، 22 ماي گونو باشقا بير حيله يه باش ووراراق، خالقي، ايدمان بهانه سي ايله يوروشه دعوت ائتميشدي. اونون اوچون دؤولتين ايدمان بهانه سي ايله يولا سالديغي بو يوروشده، آذربايجانين جاوانلاري قوشولاراق، آنا ديلي ايستگيني ايره لي سوردولر. آما، تأسوفله بو، اينسان حاقلاريني طلب ائدن جاوانلاريميزين بير چوخونون، او جومله دن علیرضا بي فرشي- نين ياخالانماسينا سبب اولدو.

 

عادتن، ايرانين تهلوکه سيزليک مأمورلاري اورکک يارانميشديرلار کي، سجيييه لرينه گؤره قوربانلاريني دالدالاردا پوسقولايارلار ياخود شخصي منزيللره گئجه ياريسي تؤکولرلر کي، غئيري قانوني گوجلريني قفيلدن ائمال ائتسينلر. نه ايسه، جناب فرشي ني باسمارلاما اولايي 24 ماي 2009- دا فيلم- آپاراتي قارشيسيندا، گؤز قاباغيندا، گؤنون ايشيق چاغيندا و قومارالايان ائل اورتاسيندا باش وئردي کي، مأمورلار اونون اوزرينه جوموب اونو کسگينليکله ياخالاماق ايسته ييرديلر. فيلمي بورادا وئريلن لينکدن ده گؤرونور کي، (http://www.youtube.com/watch?v=VWRBSo9g75g) ايران يئتگيليلري جناب فرشي نين اينسان حاقلاريني پوزماق اوزره ديرلر و بو دا بير نادير گؤرونتودور. ياخشي اولاردي کي، بو فيلمه تاماشا ائدسينيز. بورادا، جناب فرشي عؤمور- بويو اورک نيسگيلي اولان " تورک ديلينده مدرسه " سؤزلريني ترننوم ائدير. فيلم آچيقجا گؤسترير کي، باسمارلاييجي مأمورلارين ياراتديقلاري گرگينليکدن او فيزيکسل اولاراق نفسدن دوشمکده؛ لاکين اونون اورگي نين درينليگيندن چيخان سس بير معنوي عالمين پوسگورمه سيني تمثيل ائدير. بو آذربايجان ميللتي نين 30 ميليونلوق گونئي آذربايجاندا کؤروکلنن حيسسياتين سيمفونيسيدير. بو نغمه سادجه 30 ميليون آذربايجانلي نين ايلکين اينسان حاقلاري نين ديرچلمه سيدير.

 

بشريتين غورورو 20 اييول 1969- دا آمئريکالي فضاچي نئيل آرمسترونگ- ين بو سؤزلري ايله کؤروکلندي: " بيريسي اوچون کيچيک بير آدديم بشريت اوچون نهنگ آدديم. "  بو مير جناب فرشي نين " آنا ديلينده مدرسه " سؤزلرينده سيغان همن غورورا تاي دئييلمي؟ بو ايکي فردلرده اولان اينام باشقا اؤنچولرده اولان فيطرت ايله اوست - اوسته دوشور کي، اينسان مدنيتي نين ديرلري نين جبهه سيني داها گئنيشلتسينلر. بيزجه جناب فرشي کيميلر جبهه  خطلرينده ديرلر کي، اينسانليغين معنوي ديرلريني زنگينلتسينلر؛ بيز بيليريک کي، سيز آذربايجان ميللتي نين گونئي آذربايجاندا ايران ايرقچيليگي نين تؤرتديگي ظولوماتدا پاريلداماسيني قييمتلنديريرسينيز؛ بيز اولدوقجا ممنون اولدوق کي، سيز خانيم فاخته زاماني يه پلاتفورم وئردينيز کي، ايرقچيلييه قارشي ژئنئوره قورولتاييندا (20-24 آپرئل 2009) گونئي آذربايجان حاقيندا چيخيش ائتسين. سيزين بو تميز ژئستينيزه گؤره ميننتداريق و ائلجه ده جناب فرشي نين اينسان حاقلاري نين ديرچلديلمه سي اوچون سيزين همن کامپانييا آپاراماغينيز اوچون موراجيعتينيزده بولونماقداييق.

 

قاباقجادان قايغينيز اوچون ميننتداريق.

 

حؤرمت ايله : علي تاشکند

 

دونيا آذربايجانليلاري نين حاقلاريني مودافيعه کوميته سي نين صدري