آزادلیق
رادیوسو:
ایران
آذربایجانلیلارینین
سوسقون عصیانی
.
. . 
نویسنده
خبر:
خلاصه
خبرآزادلیق
رادیوسو:
«نه
ساغچییام،
نه سولچو،
میللتچییم،
میللتچی!».
بو
شعار یونون
13-ده
تبریزدکی میتینقده
سسلنیب.
ایران
آذربایجانلیلاری
پایتاخت تئهراندا
تکرار سئچکیلر
کئچیریلمهسینی
طلب ائدنلره
موناسیبتلرینی
بو جور بیلدیریبلر.
متن
خبر
آزادلیق رادیوسو: ایران آذربایجانلیلارینین سوسقون عصیانی
شاهناز بیلرقیزی
آزادلیق رادیوسو: «نه ساغچییام، نه سولچو، میللتچییم، میللتچی!». بو شعار یونون 13-ده تبریزدکی میتینقده سسلنیب. ایران آذربایجانلیلاری پایتاخت تئهراندا تکرار سئچکیلر کئچیریلمهسینی طلب ائدنلره موناسیبتلرینی بو جور بیلدیریبلر. یئنه ده پرئزیدئنتلییه نامیزد، اصلن آذربایجانلی موسوی یه دستک وئرمهدن، سئچکی مسئلهسینین اوستوندن کئچهرک و سادهجه، آذربایجانچی شوارلار سسلندیرمکله. اما گؤزلمک اولاردی کی، ایرانداکی آذربایجانلیلار پرئزیدئنتلییه نامیزد موسوی یه ایلک گوندن دایاق دوراجاق، تبریزده، اردبیلده و باشقا بؤیوک شهرلرده دستک میتینقلری کئچیرهجکلر. اما اولمادی. آذربایجانلیلار موسویدن اینجیکدیرلر. سبب حاقدا آز سونرا…
چؤهرقانلی: «تبریز قیراقدا قالمامالیدیر»
بو آرادا ایسه اؤزونو گونئی آذربایجان میللی اویانیش حرکاتی آدلاندیران تشکیلاتین لیدئری محموده علی چؤهرقانلی ایرانداکی آذربایجانلیلارا ایکینجی دفعه مراجعت ائدیب، اؤلکهدکی وضعیتی «اینانیلماز حسساس و کریتیک» آدلاندیریب. اونون فیکرینجه، ایرانداکی آذربایجانلیلار حادثهلری دوزگون قیمتلندیرمیرلر. و چؤهرقانلی آذربایجانلیلاری اعتراض آکسیالاریندا ایشتیراکا چاغیریب:
«تبریز و بوتون گونئی آذربایجان اوتورمامالیدیر. بو کریتیک، تاریخی و حساس دوروم همیشه اولمایاجاق. باخین، بوتون دونیانین گؤزو ایراندادیر. بیز قیراقدا قالمامالیییق»
آذربایجانلیلارین عوصیانی…
بو مراجعتی دیرلندیرن ایران آزربایجانینداکی فعاللاردان بیری عباس لیسانی ایسه بوتون فیکیرلره سایغی ایله یاناشدیغینی دئییر. اما علاوه ائدیر کی، بو گون ایراندا قارشی-قارشییا دوران ایکی جبهه وار – احمدی نژادلا موسوی. اما بو جبههدن کناردا بیری ده وار – آذربایجانلیلار. اونلار اعتراضلارینی سوسماقلا بیلدیریرلر. بو سوسقونلوق اصلینده، کناردان، خوصوصن ده تئهراندان عصیان کیمی باشا دوشولور:
«بو، اؤزو بیر عصیاندیر. بو دا کئچمیش تجروبهیه دایانیر»
عباس لیسانی فیکرینی بونونلا ایزاه ائدیر کی، عادتن بئله کوتلوی آکسیالاردان سونرا ضررچکن محض آذربایجانلیلار اولور. اونا گؤره ده، ایندی آذربایجانلیلار حادثهلردن کناردا دورماغا اوستونلوک وئریرلر. عینی زاماندا، عباس لیسانییه گؤره، دیگر میللتلرین میدانا چیخماسی بو گون ساواشماقدا اولان ایکی جبهنی بیرلشدیره بیلر. بو دا نهایتده میللی حاقلارینی طلب ائدهجک اوچونجو جبههیه ضربه ائندیرمهیه اساس وئره بیلر. اما بونونلا بئله:
«بیز هئچ کیمی اعتراض آکسیالارینا قاتیلماغا و یا قاتیلماماغا چاغیرمیریق. اگر اوچونجو جبهه تورکلر، کوردلر، تورکمنلر، عربلر میدانا گیرسه، اؤز میللی حاقلاری اوغروندا ساواش آپاراجاقلار».
«موسوینین سهوینی تکرار ائتمیجییک»
ایرانلی دیندارلاردان بیری، حجت السلام عبد العزیز عظیمی قدیم ایسه دئییر کی، ایندیکی مقامدا میر حسین موسوینی میداندا تک قویماق اینصافدان دئییل. اما علاوه ائدیر کی، بو گون ایراندا اینسان حاقلاری اوغروندا ساواش گئدیرسه، آذربایجان داواسی بوندان بیر آز یوخاریدا دورمالیدیر. تئهراندا ایسه بو مقامدا آذربایجانلیلاردان دستک گؤزلنیر:
«بو گون اینتئرنئتده موزاکیره اولونور کی، آذربایجان نیه تئهراندان گئری قالدی، گرک بیرینجی اولایدی. بونون جاوابیندا دئیه بیلریک کی، اوچ ایل بوندان اول «ایران» قزئتی آذربایجان خالقینا حقارت ائدنده، ایندی تئهراندا اولانلار تبریزده آذربایجانلیلارین باشینا گلدی. گنجلر گوللهباران ائدیلدی. او زامان بونا اعتراض ائتدیلرمی کی، بو گون تبریزدن ده اینتیظارلاری اولا…»
عبد العزیز عظیمی قدیم بونونلا بئله، دئییر کی، بو گون اونلار موسوینین و یا کرروبینین سهوینی تکرار ائتمهیهجک، اونا لازیمی دستک وئرهجکلر. اونلار اینسان حقوق مدافعهچیلرینین و اصلاحاتچیلارین موباریزهسینه قیراقدان باخا بیلمزلر. اوستهلیک، عبد العزیز عظیمی قدیم موسوینی موسبت لیدئر کیمی خاراکتئریزه ائدیر:
هامی دوشونوردو کی، دینی رهبر «میتینقلری بیتیرین» دیندن سونرا موسوی ده دینمهیهجک. اما بیر گون چکمهدی، او جاواب وئردی کی، رهبر آغساققاللیق ائتمک اوزینه اؤزونو آیری جیناحا وئردی، میللتی قان تؤکمکله تهدید ائتدی. رهبره قارشی بو سؤز جسارت طلب ائدیر…»
عبد العزیز عظیمی قدیم یه گؤره، بو حرکتدن سونرا موسوینین دیندارلار آراسیندا دستیی نیسبتن ضعیفلهیه بیلر، اما اوزینده دوستلارینین آرتماسی دا استثنا ائدیلمیر.
ایسوئچده یاشایان آذربایجانلی اسد صادقی ایسه دئییر کی، واختیله آذربایجانلیلارین ایشگنجه آلتیندا اؤلدورولمهسینه، اونلارین حاق داواسینا گؤز یومان فارس ضیالیلاری بو گون مؤوقئلرینی دییشیبلر:
«اونلار موسوی یه مراجعت ائدیرلر کی، گرک قئیری میللتلرین حقوقلارینی تانییا و حؤرمت ائدهسیز، اونلار دا بو حرکاتا قاتیلسینلار. یوخسا بو حرکات مقصدینه چاتا بیلمز…»
آبش-دان ایران آذربایجانلیلارینا مراجعت ائدن چؤهرقانلی ایسه کئچمیشی اونوتماغا چاغیریر:
«فارس فاشیزمی قیاملاردا، اعتراضلاردا بیزی دینلمهدی، بیزه اؤنم وئرمهدی» کیمی صحبتلر بو گون دانیشیلمامالیدیر. دئمیشدیم سیزه، احمدی نژادلا موسوینین ائله بیر فرقی یوخدور. اما بو گون بو موباریزه احمدی نژادلا موسوینین موباریزه و موناقیشهسیندن چیخیب. بو، رئژیمله موخالیفتده اولانلارین ساواشیدیر…»
عبد العزیز عظیمی قدیم دئییر کی، تئهران اعتراضچیلاری تک قالمایاجاقلار. اما یئنه ده احتیاطلی اولاجاقلار، اونلار بو ساواشدا فارسلاردان گئری قالماسالار دا، قاباغا دا کئچمهیهجکلر:
«صاباح قارپیز یئین قورتولار، قابیق یئین یوخ. آذربایجان فعاللاری یئنه حبسه دوشه بیلر، او بیریلر قیراقدا قالار…»
کوچورن: اویرنجی